С.Батболд: 2013 он манай холбооны хувьд их онцлогтой жил байх болно

Эрхэм хүндэт уяачид, морины зүтгэлтнүүд, хурдан морь сонирхогчид та бүхэнтэй Тод магнай сайтаар мэндчилж байгаадаа туйлын баяртай байгаагаа илэрхийлье.
 Бидний өвөг дээдэс олон зуун жилийн туршид адуу хэмээх тэнгэрлэг амьтныг адгуулж маллах,  уналга, эдэлгээнд ашиглах, уяж хурдлуулах өвөрмөц соёлыг буй болгосны хамгийн оргил нь хурдан морины уралдаан юм. Хурдан морины уралдаан нь нэг талаас эрийн гурван наадмын нэг төрөл болж баяр цэнгэл эдлүүлэх, нөгөө талаас адууныхаа чанар чансааг бусадтай харьцуулан жишиж, үүлдэр угсааг нь сайжруулах зорилгыг өөртөө агуулж ирсэн бөгөөд бидний өвөг дээдэс хурдан морийг шинжиж таних, уяа сойлгыг нь тааруулж, хурдлуулах өвөрмөц дэг сургуулийг буй болгон бидний үед өвлүүлсэн билээ.
Монголын морин уралдааны хөгжилд Төв аймагчууд, тус аймгаас төрөн гарсан үе үеийн эрдэм төгс уяачдын оруулсан хувь нэмэр үнэлж баршгүй их юм.
Манай аймгаас Монгол улсын Тод манлай уяач 7, Манлай уяач 18, алдарт уяач 30, аймгийн алдарт уяач 196 төрөн гарсны 4 нь 2012 онд болзол хангаж цол тэмдэгээ гардаж авсан.
Төв аймгийн Морин спорт уяачдын холбоо буурал дээдсийнхээ өвлүүлсэн энэ их өв соёлыг хадгалж хойч үедээ уламжлан үлдээх, цаашид орчин үеийн жишиг шаардлагад нийцүүлэн улам боловсронгуй болгож хөгжүүлэх, уяачид, унаач хүүхдүүдийн эрх ашгийг хамгаалах чиглэлээр бодитой ажлуудыг санаачлан хэрэгжүүлж, улиран одож буй 2012 оноо ололт амжилтаар дүүрэн үдэж байна. Манай аймгийн уяачид Үндэсний их баяр наадам, бүсийн уралдаануудад өндөр амжилт гаргаж оролцсоны зэрэгцээ “Дүнжингаравын хурд” өвлийн бүсийн уралдааныг Зуунмод суманд, “Төвийн бүсийн хурдан морины зуны уралдаан”-ыг домогт “Хүй долоон худаг”-таа амжилттай зохион байгууллаа. Аймгийнхаа морин уралдааны түүх, өв уламжлал, үе үеийн алдар суут уяачид, хурдан хүлэг морьдоо алдаршуулах зорилгоор аймгийн Музейд тусгай булан нээж, холбооны үйл ажиллагаа болон уяач, хурдан морьдын талаар сурталчлан таниулах, цахим хуудас байгуулах, аймгийн төвдөө “Морины ордон” байгуулахаар бэлтгэл ажлыг хангаад байна. Хурдан морь унаач хүүхдүүдийн эрх ашгийг хамгаалах ажлыг холбооны үйл ажиллагааны гол чиглэл болгон ажиллаж, “Хүүхдийн болзошгүй эрсдэлээс урьдчилан сэргийлэх, хамгаалах үйл ажиллагааны санамж бичиг”-ийг холбогдох 14 байгууллагатай байгуулж,  сумдын уяачдын холбооны тэргүүлэгчдэд энэ талаарх сургалт, семинарыг хүүхдийн байгууллагатай хамтран зохион байгуулсан. Үүний үр дүнд бүсийн болон сумдын бүсчилсэн уралдаануудад хурдан морь унаач хүүхдүүдийг бүрэн хэмжээнд стандартын хамгаалах хэрэгсэлтэй оролцууллаа.
Угтан золгож буй 2013 он бол манай холбооны хувьд их онцлогтой жил байх болно. Энэ онд төрөлх Төв аймаг байгуулагдсаны түүхт 90 жилийн ой тохиож байгаа. Их ойн жил бид бүхэн алдар суут уяачид, домогт хурдан хүлгүүдээ алдаршуулан сурталчлах, хүндэтгэл үзүүлэх, унаач хүүхдүүдийн аюулгүй байдал, эрх ашгийг хамгаалах ажлыг улам боловсронгуй болгох талаар нэлээдгүй ажлыг хийж, хэрэгжүүлэхээр төлөвлөөд байна.
Нийт Монголын ард түмэндээ болон үе үеийн уяачид, морин уралдааны хөгжилд үнэтэй хувь нэмэр оруулж буй морины зүтгэлтнүүд, унаач хүүхдүүд Та бүхэндээ угтан золгож буй шинэ оны халуун мэндийг дэвшүүлье.

Унага болгон босоо төрж
Уясан хүлэг болгон тань хурдан байх болтугай

УЛСЫН ИХ ХУРЛЫН ГИШҮҮН,
ТӨВ АЙМГИЙН МОРИН СПОРТ,
УЯАЧДЫН ХОЛБООНЫ ТЭРГҮҮН Сундуйн БАТБОЛД