"Тод магнай" сэтгүүлийн шинэ дугаар хэвлэгдэн гарлаа

Хаврын адаг шар луу сарын шинэхэн дугаараа  уншигч таны өмнө дэлгэж байна. Юун түрүүнд энэ удаагийн дугаар мэдээллийн багтаамж сайтай, өргөн агууламжтай товчхондоо “уншууртай” сэтгүүл болсон гэдгийг дуулгахдаа таатай байна.
Мориор дамжсан үндэсний өв соёлыг хойч үедээ түгээн дэлгэрүүлэх хэтийн зорилготой “Тод магнай” сэтгүүлийн  энэ удаагийн зочны хойморт, Булган аймгийн Могод сумын уугуул Манлай уяач Цэгмидийн Цэнгэл уригдлаа.
Төрийн наадмын түрүү домогт саарал азарганы эзэн Ц.Цэгмид Манлай нэгэн үе төр түшилцэн, түмэн олныхоо дуу хоолой болж явсан билээ. Түүний нэртэй хүлэг алс холын Америкт түрүү магнайгаар тодорч, Монгол Улсын нэрийг цуурайтуулж буйг морь сонирхогчид мэдэх биз. Ийнхүү хуучлах баялаг түүхтэй Манлайн шимтэй ярилцлагыг та зочны булангаас хүлээн авч уншаарай. Энэ удаагийн дугаараас эрхэм танд онцлон санал болгох дараагийн нийтлэл бол Монголын хурдан морины нэгэн цаг үеийн түүх, домог болсон Батлан хамгаалах туслах нийгэмлэгийн адуун сүргийн тухай Манлай уяач Т.Даваадоржийн бичсэн сонирхолтой мэдээлэл юм. Хурдан морь сонирхогч уншигч та бүхэн зав гарган заавал уншаарай.
Монгол орноо морьтойгоо тойрохоор зориг шулуудсан “Морьтон Монгол” төслийн залуус товлосон хугацаандаа аян замдаа гарсан. Тэдний аяллын сонин хачин мэдээлэл, фото зургийг та зөвхөн “Тод магнай” сэтгүүлээс л хүлээн авч унших боломжтой. Түүхэн аяллын хөтөч байхыг хүсвэл та 33-35 нүүрэнд саатаарай хэмээн зөвлөх байна.
Уламжлалт “Уралдаан” булангаар дамжуулан энэ хаврын гол гол уралдаануудын мэдээллийг хүлээн авах боломжийг “Тод  магнай”-н 53 дахь дугаар танд олгож байна. Улс, бүсийн наадмын түрүү, айргийн хүлгэд тодордог “Жавхлант шаргын хурд” уралдааны мэдээллийг та анхаарч нэг хараарай. Магадгүй энэ жилийн төрийн наадмын түрүү, айргийн хүлгэд тэнд янцгааж байж ч мэднэ.
Далны ясыг амилуулж, урлагийн бүтээл туурвидаг авьяаслаг уран бүтээлч ээлжит үзэсгэлэнгээ нийтийн хүртээл болгохоор зэхэж буй гэнэ. СТА, дуучин, сийлбэрч Т.Баттогтохын долоо дахь удаагийн үзэсгэлэн “Далны морьд” нэртэй бөгөөд адуу, түүний ахуйтай холбоотой 30 гаруй бүтээл багтсан гэнэ лээ. Уншигч та “Далны морьд”-ын гайхамшгийг мэдрэхийг хүсвэл энэ сарын сүүлээр “Маршал Арт” галарейд нэг саатаарай. 
Жилдээ ганцхан монгол наадамдаа бэлтгэн хурдан морьдынхоо уяа сойлгыг тааруулж буй эрхэм уяачид та бүхэн “Уяаны эрдэм”, “Эмч зөвлөж байна” булангуудыг заавал уншаарай. Танд тустай мэдээллүүд багтсан байгаа.
Биднийг сонгон хамт байдаг уншигч та бүхэндээ баярлалаа.