МУ-ын Алдарт уяач Г.Доржпүрэв:Азарга түрүүлж Манлай уяач цолны болзол хангасан

-“Хотгойдын хурд” хангайн бүсийн уралдаанд хамгийн одтой наадсан уяач бол Алдарт. Нутгийн дэвжээнээ амжилттай наадсан танд уншигчдынхаа өмнөөс баяр хүргэе?
-Баярлалаа. “Хотгойдын хурд-3”хангайн бүсийн уралдаан амжилттай сайхан боллоо. Энэ удаагийн уралдаанд нас болгоны адуутай ирж, азарга түрүүлгэж, хязаалан, шүдлэн айрагдуулж нэг түрүү, гурван айраг авлаа. Нутгийн тэнгэр ивээж сайхан наадсандаа сэтгэл хангалуун байгаа. Сүүлийн хэдэн жил нутагтаа ирээгүй. Зорьж ирж сайхан наадлаа.
-Шүдлэнгийн уралдаанд хоёр ч үрээ орсон байх?
-Тэгсээн. Нэг үрээ аман хүзүүдэж, нөгөө нь айргийн дөрвөөр давхисан. Мөн манай адууны угшилтай хэд хэдэн морь айрагдана билээ.Адуугаа сайжруулан чанаржуулах гэж олон жил зүтгэсний үр шим ийнхүү гарч, нутгийн олноо баярлуулсандаа бахархаж байгаа.
-Үе үеийн “Хотгойдын хурд” уралдаануудад амжилт дүүрэн наадсаар ирсэн?
-Тэгсээн. Анхны “Хотгойдын хурд”-д уралдаанд хүрэн азарга маань айргийн гуравт хурдалж байсан бол хоёр дахь даншигт хонгор шүдлэн түрүүлж, Толбот хүрэн маань даагандаа таваар давхиж байсан. Өнөө жил нэг түрүү, гурван авлаа. Нутгийнхаа дэвжээн дээр ингэж наадах сайхан байлгүй яахав.
-Ингэхэд Толбот хүрэн мордсон уу?
-Мордсоон, сайнгүй байхаар нь татуулчихсан. Саран хүрэн нь сайн байхаар нь Толботоо нэг их шахуулсангүй. Төрийн наадмын түрүү хүлэг шүү дээ. Тэгэхээр сайн хүлгийг гамнах хэрэгтэй байх.
-Энэ удаагийн “Хотгойдын хурд-3” уралдааны нэг онцлог нь хоймор нутгаас шинэ цолтон төрүүлсэн явдал хэмээн холбооны тань нарийн бичгийн дарга тэмдэглэсэн.Манлай уяачийн болзол биелчихсэн үү?
-Залуучууд тэгж байгаа бол биелсэн байхаа. Ер нь бол тооны хувьд эрт гүйцсэн. Чанар л дутаад байсан юм. Сая азарга түрүүлгээд Манлайн болзол биелж байгаа байх. Нутгийн дэвжээ ивээж, моринд дуртай олны маань заяа түшин Монгол төрийн том цолонд хүрч байгаа нь сайшаалтай. Ерөөл бэлгэ биелж хонь жилийн босгон дээр нутгийн түмнээ баярлуулах бизээ.
-“Хотгойдын хурд-3” уралдаан юугаараа онцлог байсан бэ?
-Хөвсгөл аймагт маань болдог “Хотгойдын хурд” хангайн бүсийн уралдаан олон газрын уяачид ирж оролцдог нэр хүндтэй уралдаан. Энэ уралдаанд түрүүлж айрагдсан хүлгүүд улсын наадамд айрагддаг. Энэ жилийн уралдаан ч гэсэн олон газрын хурд цугларсан сайхан наадам боллоо. Гол онцлог нь манай аймгийн уяачид амжилттай сайхан наадсан.Ер нь нас болгонд айраг түрүү авсан байх шүү. Залуучууд маань морио сайн уяж нутгийн нэр гаргаж байгаа нь энэ уралдааныг зохион байгуулсаны гол зорилго үр дүн шүү дээ.
-Санал нэг байна. Монгол улсын Манлай уяач цолоо авах баярт мөчид тань дахин уулзая. Ярилцсанд баярлалаа.
-Та бүхний ажил үйлсэд амжилт хүсч, нутгийн олондоо мэндчилгээ дэвшүүлж, сайн сайхан бүхнийг хүсэн ерөөе.
Б.Долзодмаа