Хүсэл биелүүлэгч хурдан хүрэн

Уясан хүлэг морьдоо урамтай сайхан хурдлуулж буй аав, хүү Алдартууд өнөө жил ч гэсэн ганзага дүүрэн наадлаа. Төрийн наадам албан ёсоор эхэлсэн 7-р сарын 10-ны өдөр олон жилийн хүслээ биелүүлсэн Дундговь аймгийн Хулд сумын харьяат, аймгийн Алдарт уяач Баярсайханы Лхагва-Очирын хурдан хүрэнг уншигч танаа танилцуулъя.
Удам, угшил:
Б.Баярсайхан Алдартын унаган адуу.
Эцэг: Төв аймгийн Баян-Өнжүүл сумын харьяат МУ-ын Алдарт уяач Цэрэндашийн Жамбалсүрэнгийн бүсийн уралдаанд нэг түрүүлж, нэг аман хүзүүдсэн Хандгай хүрэн азарганы төл говийн бүсийн уралдаанд хоёр түрүүлсэн хүрэн азарга. 
Эх: Алдартын унаган цэгээн /зээрд/ гүү. Энэхүү  зээрд гүүнээс гарсан зургаан эр төл зургуулаа хурдлаад буй бөгөөд ууган төл хүрэн азарга Дүнжингаравын хурдад тавлаад, говийн бүсэд аман хүзүүдсэн. Түүний дүү хүрэн соёолон энэ жил “Мандалын хурд”-д гуравлаад, аймгийнхаа зүүн, баруун бүсэд айрагдсан. Бас нэг дүү хүрэн үрээ нь өнгөрсөн жил даагандаа “Говь шанхын хурд-5” говийн бүсийн уралдаанд түрүүлсэн. Өнөө жил хамгийн бага дүү нь Дундговь аймгийн Сайхан-Овоо сумын баяр наадамд аман хүзүүнд хурдалжээ.
Амжилтын товчоон:
2015 онд шүдлэн:
Хулд суманд болсон хаврын уралдаанд айргийн тав
Өмнөговь аймгийн хаврын бүсийн уралдаанд айргийн дөрөв
Өмнөговь аймгийн зүүн бүсийн уралдаанд түрүү
АХ-ын 94 жилийн ой үндэсний их баяр цэнгэл наадамд айргийн гурав
2016 онд хязаалан:
Сайхан-Овоо суманд болсон овооны тахилга уралдаанд түрүү
Гурвансайхан суманд болсон овооны тахилга уралдаанд түрүү
АХ-ын 95 жилийн ой үндэсний их баяр цэнгэл наадамд түрүү
Өмнөговь аймагт болсон говийн бүсийн уралдаанд аман хүзүү
А.Энхжил