Аймгийн заан Ж.Баатарсайхан: 2015 он миний хувьд хийморьтой сайхан жил болсон

Дорнод аймгийн Цагаан-Овоо сумын уугуул, Говьсүмбэр аймгийн Шивээговь сумын харьяат, аймгийн Заан Жаргалсайханы Баатарсайхантай хийсэн ярилцлагг уншигч танаа хүргэж байна.
-Эрийн гурван наадмынхаа хоёроор нааддаг байгаа шүү дээ. Хэдэн жил морь уяж байна вэ?
-Наймтайгаасаа дөрвөн жил хэртэй хурдан морь унасан. Энэ хугацаандаа бага наадам, овооны ганц нэг баяраар гайгүй давхиулж л явлаа. Бас Цагаан-Уул сумын 60 жилийн ойгоор азарга түрүүлгэж байсан. Оныг нь сайн санахгүй байна, бас их нас түрүүлгэсэн юмдаг. Унаачийн хувьд амжилт нэг иймэрхүү. Ингээд хасагдаад морь хөлслөх, тарлах гээд туслах уяачийн ажилд шилжиж байгаа юм. Миний төрсөн ах Мөнхсайхан, аавын нагац ах Данжаагийн Гантөмөр нарыгаа дагаж аймаг, ойр хавийн сум орон нутгийн баяр наадмаар морьдоо хөтлөөд явдаг байлаа. Одоо бол хээр халтар зүсмийн хязаалангаар наадаж байна. Өнгөрсөн зун Цагаан-Овоо сумынхаа баяр наадмын сунгаанд түрүүлгээд, Цагаан-Овоо сумын 80 жилийн ойн баяр наадмаар 19-өөр давхиулсан. Ах нь бас шар халтар зүсмийн адуу байдаг Мөн л жижиг наадмуудад хоёр, гурав айрагдсан. Сүхбаатар аймгийн Онгон сумын Монхорын Нямаа гэж хүний адуу. Манай хадамд бэлгэнд ирсэн юм.  Хадам аав маань Сүхбаатар аймгийн Онгоны 90 жилээр 124 азарганаас халзан хүрэн азаргаа түрүүлгэлээ. Энэ жил бас Дорноговь аймагт айргийн гурваар давхиулж, Боржигон наадамд 19-өөр оруулсан. Дорноговь аймгийн Өргөн сумын овооны наадамд бас түрүүлгэсэн амжилтыг энд дурдмаар байна. 
-Өвөг дээдсээс уламжлан ирсэн хурдан буянгууд бий юу?
-Өвөг эцэг Дамчаа, өвөө Бөмүү, аав Жаргалсайхан гэж улс байлаа. Ааваас сонсоход Дамчаа гэж хүн морь уядаг байсан гэдэг. Харин өвөө Бөмүү адуу мал их сайн цуглуулдаг байж. Бор, борлог зүсмийн адуунууд хурдлуулдаг байсан гэж байна лээ. Харин манай аав морь маланд сонирхолтой ч уяж байгаагүй. Насаараа л жолоо мушгисан хүн бий. Аавын дүү Чимэддорж бол сумандаа бас гайгүй морь уяж хурдлуулдаг уяач. Бас Бөмүүгийн эгч нь Хандын хүү Гантөмөр гэж  хурдан хүлгийн дэл сүүл шуусан уяач байна.
-Шинэ цагийн адуугаар цус сэлгэж байна уу?
-Дорнод аймгийн Цагаан-Овоод миний аав ээж, ах эгч амьдарцгааж байна. Миний хоёр, гурван азарга адуу тэнд бий. Бас Сүхбаатарын Онгон суманд хадам талын угшил сайтай хүлгүүд байна. Хооронд нь цус сэлгээд л явна. Харин уралдаж, сойх тал дээр Говьсүмбэр аймгийнхаа холбоотой хамтраад гал байгуулах санаатай хоёр гурван жил нөхөдтэйгээ үзээд л явна.
-Нутагтаа хэр наадаж байна вэ?
-1999-2004 оны хооронд ахтайгаа нийлээд гайгүй морь уяж байсан л даа. Хүрэн даагаа хоёр ч айрагдуулсан. Барилдана, хажуугаар нь ажлаа хийнэ гэхээр амаргүй юмаа. Манай уурхайн ажил чинь цаг наргүй хэцүүг хэлэх үү. Тогтвортой морио уяж чадахгүй байна. Гэхдээ одооноос бөхөөс илүү моринд анхааръя гэж шийдсэн.
-Цаг заваа гаргаж ярилцсанд баярлалаа. Олон олон наадмын түрүү авч торгон жолоогоо өргүүлэх болтугай.
-Говьсүмбэр аймгийн уяачдын холбоо, нийт морь сонирхогч залуус, хүүхэд багачууддаа уясан хүлэг нь хурдан, унасан хүүхэд нь цовоо байх болтугай гэж ерөөе.

"Тод магнай" сэтгүүл Говьсүмбэр аймгийн тусгай дугаар