Уяач Б.Сэр-Од: Халзан даагаараа төрийн наадмын анхны айргийг хүртлээ

-Хонгор нутгийн түмний хийморийг өргөсөн танд баяр хүргэе. Сэтгэгдэл өндөр байна уу?

-Тэгэлгүй яахав. Ардын хувьсгалын 99 жилийн ой, Үндэсний их баяр цэнгэл наадамд өөрийн унаган даагаа айргийн тавд хурдлуулсандаа маш их баяртай байгаа. Өмнө нь улсын бүсийн уралдаанаас таван айраг, түрүү хүртэж байсан. Энэ жил халзан даагаараа төрийн наадмын анхны айргийг хүртлээ. Баяртай байна. Түүнээс гадна төрж өссөн хонгор нутгаас минь төрийн наадмын хоёр айраг хүртсэнд баяртай байгаа. Хонгор нутгийн минь уяачид сэтгэл хангалуун сайхан наадацгаасан байх. 
-Эргэлзэхгүй байна. Ингэхэд та ямар бүсийн уралдаануудад морь айрагдуулж байсан билээ. 
-2015 онд “Говьшанхын хурд-5” говийн бүсийн уралдааны эрлийз дунд ангилалд Ажнай халзан үрээгээ айргийн дөрвөөр давхиулсан. Тэр жил Булган аймагт болсон хангайн бүсийн уралдааны эрлийз дээд ангилалд халзан морь маань айргийн гуравт давхиж байлаа. 2017 оны баруун бүсийн уралдаанд шарга үрээ аман хүзүүнд хурдалж байсан бол 2018 оны “Дэлтэй цэнхэрийн хурд” бүсийн уралдаанд бор азарга айргийн гуравт хурдалсан. 

-Морь уяад удаж байна уу? 
-13 жил болж байна. Энэ жил даага, азарга хоёр мордуулсан. Азарга маань 35-аар давхилаа. 
-Баянхонгор аймагт болсон бүсийн уралдаануудад оролцож байсан уу?
-2019 оны бүсэд очсоон. Бор азарга маань зургаалж, шүдлэн үрээ есөөр давхиж, бас нэг үрээ 12-т орно лээ. 
-“Дорнын унага” галын гишүүн бил үү? 
-Тийм ээ. 2007 оноос хойш Дорнод аймгийн Матад сумын харьяат, Манлай уяач Бат-Очирын Цэндбаатартай хамтран морь уяж байгаад, өнгөрсөн жилээс адуугаа наашлуулж Баянжаргал дүүгээрээ уяулж байгаа. Манай адуу Матадад 10 гаруй жил нутагласан. 
-Бидний урилгыг хүлээн авч ярилцсанд баярлалаа.

Б.Хастөр