Аймгийн Алдарт уяач Д.Ганзориг: “Аавын минь адуу” гэж хэлэхийг сонсох хамгийн сайхан байсан

-Унаган адуугаа түрүүлгэж, айрагдуулах нь уяачийн хамгийн том бахархал байдаг. АХ-ын 99 жилийн ойн баяр наадам танай гэр бүлийн хувьд хамгийн сайхан дурсамжийг үлдээсэн байх.

- Их сайхан наадлаа. Унаган адуугаараа нэг түрүү, гурван айраг хүртсэндээ маш их баяртай байна. Миний хувьд 2003 оноос эхэлж морь уяад, 2007 онд Хандгай хэмээх хээр соёолонгоо улсын наадамд аман хүзүүдүүлж, төрийн наадмын анхны айргаа хүртэж байлаа. Түүнээс хойш хурдны чиглэлийн адуутай болъё хэмээн шийдэж, азарга, гүү цуглуулж эхэлсэн. Түүнээс хойш 10 гаруй жилийн дараагаас унаган адуунууд хурдалж эхэлдэг юм байна. 
-Тодорхой хугацаанд хүлээх хэрэгтэй болдог байх нь. 
-Тэгэлгүй яахав. Ер нь яарч болохгүй. 2006 онд анхныхаа араб азаргыг аваад үржил хийж эхэлсэн. Түүний дараа 2012 онд Монгол Улсын Алдарт уяач Баярмагнайн Тэрбиш гуайг дагаж, Орос яваад англи азаргаа авчирч байлаа. Сүүлд нь  малын эмч Адьяагийн Наранбаатарыг дагаж Ирланд яваад  алдарт Галилеон төл азаргыг авчирсан. Тэрхүү азарганы анхны төл даага энэ жил улсад айрагдлаа. Сайн адуу бий болгох нэг хэрэг. Сайн адууг сайн уях өөр хэрэг. Манай уяач Батмөнхийн Батхүү бид хоёр хамтраад 10 гаруй жил болж байна. Манай адууны арга барилыг сайн мэдэрдэг хүн. 

-Сүүлийн жилүүдэд айраг, түрүү бөөндөөд л байгаа. Төрийн зарлигт наадмаас хичнээн хишиг хүртээд байна вэ?
-Манай хоёр хүү, бид гурвын нийлсэн улс, бүсийн уралдааны 23 айраг, түрүүгийн амжилт бий. Энэ жил халтар морь айрагдаад улсын Алдарт уяач цолны болзол чанарын хувьд хангагдаж байгаа юм. 
-Арав гаруй жилийн хугацаанд тохиосон хамгийн сайхан наадмынхаа дурсамжаас хуваалцаач.
-Ноднин шүдлэн үрээ улсад түрүүлэхэд онцгой их баярласан. Ганбаяр маань цэнхэр хашааны тэнд ирчихээд “Аав та ор” гэхэд нь “Үгүй, би орохгүй. Чи өөрөө ор” гэсэн юм. Тэгээд миний хүү хөлсний хашаанд ороод хөөрхөн ярилцлага өгөөд, “Аавын минь адуу” гэж хэлэхийг сонсох хамгийн сайхан байсан даа. Мөн 2019 оны наадмуудаас манайх унаган адуугаараа нэг түрүү, таван айраг авахад их баярласан. Ер нь унаган адуунуудаа айрагдуулж, түрүүлгэх бүртээ аз жаргалыг мэдэрдэг. 
-100 жилийн ойн баяр наадмын хурдан морины уралдааныг зохион байгуулах комисст уламжлах хүсэлт байна уу? Дайж болно шүү.
-Баярлалаа. Соёолон насны морьдын амжилтыг дээд насанд оруулан тооцож өгөөч гэдэг хүсэлт даймаар байна. Мөн эрлийз, монголоор нь ялгахдаа шууд өндрөөр нь хэмжээд сэрвээ  давсныг эрлийз ангилалд нь уралдуулдаг болмоор байгаа юм. Гурав дахь нь хаврын уралдааныг зохион байгуулдаг болох. Ийм гурван санал хүргүүлмээр байна.
-Баярлалаа. Уламжлах болно оо.

Б.Хастөр