Ёсыг сахисан ууган шавь

...“Орхон аймгийн Баян-Өндөр сумын харьяат, аймгийн Алдарт уяач  Нямжавын Норовжамцын уясан...” гэсэн тайлбарыг чихэндээ хоногштол сонссон зун байлаа.

Тэгэхээс ч аргагүй юм. Их сургуулийн ширээнээс адууны жүчээ рүү өөрийн хүсэлтээр урвасан Н.Норовжамцын “Хийморийн хүлэг” галынхан энэ зун төрийн зарлигт наадмаас нэг түрүү, таван айраг, орон нутгийн чанартай наадмаас /зөвхөн Орхон аймагт болсон/ 11 түрүү, 20 гаруй айраг хүртэн хавтай сайхан нааджээ.

Бидний чихэнд хоногшсон дээрх тайлбар улсын наадмаас эхэлсэн. Аз хийморийн бэлгэдэл соёолон уралддаг 12-ны өглөө Хүйн долоо худаг даяар 555 дугаартай уралдаанч хүүгийн унасан зээрд үрээг зарлахдаа түүний нэрийг хэлж байв. Учир нь өнгөнд уралдаж буй Орхон аймгийн Баян-Өндөр сумын харьяат, аймгийн Алдарт уяач Чулуунбатын Батжаргалын Зээрэн хэмээх зээрд соёолонгийн уяа сойлгыг Н.Норовжамц тааруулсан юм.

Зээрд зээрд 33 минут 58 секундад замаа туулан аман хүзүүнд баригдаж, Н.Норовжамц төрийн наадмын анхны хишгээ хүртлээ. Үүний маргааш буюу 7-р сарын 13-нд мөн л дээрх хоёр эрхмийн нэртэй хээр адуу сонгомол дээд насны ангилалд айргийн тавд баригдав. Ийнхүү гар ганзага нийлсэн залуус монгол төрийн наадмаас хоёр айраг хүртэн сэтгэл хангалуун буцацгаасан билээ.

Тэдний дараагийн наадам Завхан аймагт өрнөв. Ч.Батжаргалын эцэг дээдсийн нутаг тул ийн зорих нь зүйн хэрэг.

Адуун сүргийн манлай азарганы уралдаанд төрийн наадмын түрүү Гоё хээр, аман хүзүү Нарт хонгор, айргийн гуравт хурдалсан Уулс хүрэн гэх хатуухан самрууд морджээ. Энэ өдөр шандас шалгасан 105 шигшмэл хүлгээс Н.Норовжамцын уясан Орхон аймгийн Баян-Өндөр сумын харьяат, аймгийн Алдарт уяач  Равжирын Мягмардоржийн хамар цагаан зээрд азарга айргийн дөрөвт баригдаж

, соёолонгийн уралдаанд Ч.Батжаргалын Зээрэн зээрд нь түрүүлэв.

Сонгомол дээд насны ангилалд улсад тавласан Элбэг хээр нь дахин айрагдлаа. Ийнхүү Н.Норовжамц Алдарт баруун бүсээс нэг түрүү, хоёр айраг хүртэв.

Архангай аймгийн түүхт 100 жилийн ой, хангайн бүсийн уралдаан. Хангайн бүсийн их насанд 220 гаруй хурдан хүлэг шандас шалгаж, хээр морь нь айргийн гуравт хурдалжээ. Энэ зун Орхон аймгийн баяр наадамд түрүүлсэн хээр морь төрсөн ах Нямжавын Ишжамцын нэрээр айрагдаж, тав дахь айргийг нь авчирлаа. Ийнхүү Н.Норовжамц Алдартын уясан хүлгүүд нэгэн зуны наран дор төрийн зарлигт наадмаас нэг түрүү, таван айраг хүртжээ.

2010 оноос уяхуйд суралцаж, уралдахуйд шамдаж буй Н.Норовжамц уяач 2013 онд орон нутгийн ханасан цолонд хүрсэн бөгөөд өнгөрсөн жил төрийн зарлигт наадмын анхны хишгээ хүртсэн юм.

Тэрээр Хөвсгөл аймагт болсон хангайн бүсийн уралдаанд Зээрэн зээрдээ, хээр соёолонгоо тус тус айргийн дөрөвт хурдлуулсаныг санаж буй байх.

Морь уяад удаагүй орон нутгийн ханасан цолонд хүрсэн тэрээр дэвжээгээ  томруулахаар 2018 онд Тод манлай уяач Ононгийн Батбилэгт хадаг, мөнгөн аягатай сүү зэхэн  шавь оржээ. Энэ цагийн эрэмбэтэй сайн уяачдын нэг О.Батбилэг ёсыг сахисан анхны шавьдаа сэтгэл харамгүй зөвлөж, шавь ч нь хичээсээр 2021, 2022 онд Орхон аймгийнхаа шилдэг уяачаар шалгаран багшийн магнайг тэнийлгэжээ. /2014 онд мөн Орхон аймгийн шилдэг уяачаар шалгарч байсан/

Ийнхүү Нямжавын Норовжамц хэмээх нэгэн эрхэм  гартаа галт бамбартай ирж яваа даг шүү.

А.Тэлмэн