"Mонгол уяач-3000" Дорнод аймагт

Дорнод аймгийн МСУХ-ны 15 жилийн ой энэ сарын 25-нд тохиолоо. Ойн хүрээнд Чойбалсан суманд соёолон, их нас, азарга насны хурдан морьдын уралдаан болж, “Адуучин” нэвтрүүлэгт  хийморилог уяачид нь оролцож шандасаа сорьсон юм. Мөн ММСУХ-ны “Монгол уяач-3000” уулзалт зөвлөлгөөн аймгийн технологийн коллеж дээр боллоо. ММСУХ-ноос 21 аймгийн салбарт холбоодтойгоо явуулж байгаа энэхүү зөвлөлгөөнд ММСУХ-ны төлөөлөгчид, аймгийн МСУХ-ны гишүүд, тэргүүлэгчид, аймгийн уяачид оролцсон юм. Зөвлөгөөний эхэнд ММСУХ-ны Ерөнхийлөгч М.Энхболдын ирүүлсэн мэндчилгээг нийт уяачдад дуулгасан бол Ерөнхий нарийн бичгийн дарга П.Сэргэлэн товч тайлан, бодлого, үйл ажиллагаа, цаашдын зорилтын тухай танилцууллаа. Мөн аймгийн МСУХ-ны тэргүүн Х.Болорчулуун өнгөрсөн хугацаанд хийж хэрэгжүүлсэн ажлаа тайлагнав. Тус уулзалт зөвлөгөөний үеэр ММСУХ-ны хүндэт өргөмжлөлөөр Аймгийн Алдарт уяач Т.Итгэл, Б.Чимэддорж, Ц.Эрдэнэцогт, Ц.Баатар, М.Пүрэвсайхан нарын таван уяачийг шагнаж урамшуулав. Мөн Дорнод аймгийн МСУХ-ны хүндэт Ерөнхийлөгч Н.Ганбаатар болон оролцсон нийт уяачдад гарын бэлгээ гардуулсан юм.
Энд тэмдэглэхэд Дорнод аймгийн МСУХ ээлжит 4-р бага хурлаа өнгөрсөн 2-р сарын 13-ны өдөр аймгийн төвд зохион байгуулж дарга, дэд дарга нараа шинээр сонгон, 31 тэргүүлэгч гишүүдтэй болоод байгаа ажээ. 
 П.Ундраа