Хамгийн хурдан Сиатл Слью (Seattle Slew)

Хурдан морины уралдааны түүхэн дэх хамгийн агуу хүлгүүдийн нэг нь Сиатл Слью хэмээх халтар азарга билээ. Тэрээр Гурван Титэм-ийн 10 дахь эзэн бөгөөд энэ цолыг хүртэхээсээ өмнө магнайдаа тоосгүй буюу босоо байсан цорын ганц адуу юм. Америкийн морин уралдааны 140 гаруй жилийн түүхэнд Гурван титэм-ийн эзэн цолыг ердөө л 11 адуу хүртээд байгаа гэдгийг манай хурдан морь сонирхогчид мэдэх биз ээ.
 
Америкийн Морин Уралдааны Алдрын Танхимын гишүүн, Оны хүлэг, Оны шүдлэн үрээ, Оны хязаалан үрээ, Оны адуу, Оны шилдэг азарга гээд адууны авч болох бүхий л цол хэргэмийг хүртсэн Сиатл Слью нь XX зууны шилдэг хүлгүүдийн жагсаалтын 9-д эрэмбэлэгддэг байна.
 
1974 оны 2 дугаар сарын 15-нд Кентакид төрсөн Сиатл Слью-н эцэг, эх нь 2-уулаа агуу Неарко-н хамгийн алдартай төлүүдийн нэг Насруллах-н 3 дахь үеийн төлүүд ажээ. Умардын бүжигчин, Мистер Проспектор, Секретариат гээд цэвэр үүлдрийн адууны түүхэн дэх шилдэг адуунууд бүгдээрээ Неарко-н үр удам гэдгийг манай цахим хуудасны уншигчид мэдэж байгаа байхаа. Ер нь эдүгээ хурдалж байгаа бүх адууны 70-80 хувь нь Умардын бүжигчний үр удам бол 30-40 хувьд нь Мистер Проспектор, Секретариат, Сиатл Слью гэсэн 3 азарганы цус тус бүр шингэсэн байдаг. Дашрамд сонирхуулахад, Умардын бүжигчний үржүүлгийн хураамж 1 сая долларт хүрч байсан бөгөөд түүнийг 20 настайд нь 40 сая доллараар худалдаж авах санал тавихад эзэн нь татгалзаж байсан гэдэг.

Унаган эзэн Бен С’Кастлмен нь Сиатл Слью-г төдийлөн тоолгүйгээр даага байхад нь Тейлорын гэр бүлийнхэнд 17500 доллараар худалдчихжээ. Сиатл Слью нь уралдсан цагаасаа эхлэн Карин болон Мики Тейлор нарын эздээ дандаа баярлуулах болсон байна. Тэрээр шүдлэн насандаа 3 уралдаж бүгдэд нь тасархай түрүүлэв. Хэдийгээр цөөхөн уралдсан ч Америкийн Оны шүдлэн үрээ цолыг хүртжээ. Уралдахаар гарааны төхөөрөмж рүү явахдаа өлмий дээрээ бүжиглэх мэт хөнгөн явдаг халтар үрээ үзэгчид, морины хорхойтнуудын анхаарлын төвд орж эхэлсэн байна.

Сиатл Слью-н уяач-дасгалжуулагч Билли Төрнер түүнийг хязаалан болоход нь уралдуулах гэж төдийлөн яарсангүй. Гурван титэмийн уралдаануудаас өмнө Вүүд мемориал стейкс, Фламинго стейкс зэрэг 3 уралдаанд л мордуулсанд бүгдэд нь хол тасархай түрүүлэв. Улмаар Кентаки Дерби, Прийкнес Стейкс, Белмонт Стейкст дараалан тасархай түрүүлж, Гурван титэмийн 10 дахь эзнээр тодорчээ.  Харин дээд зэрэглэлийн олон уралдаанд түрүүлснийхээ дараахан Свопс Стейкс уралдаанд 4-т орсон нь Сиатл Слью-н хувьд цорын ганц барианд орж чадаагүй тохиолдол болжээ. Гэвч тэрээр Америкийн Оны хүлэг цолыг бараг л өрсөлдөгчгүйгээр хүртсэн байна.

Харамсалтай нь Сиатл Слью энэ бүх амжилтынхаа дараа нилээн хугацаанд уралдаж чадсангүй. Бараг жил гаруйн дараа л өвчин нь эдгэж, тун удаан хугацааны дараа формондоо орсон байна. Ингээд хэд хэдэн уралдаанд тасархай түрүүлж, харих болоогүйгээ харуулсан Сиатл Слью нэгэн томоохон уралдаанд бэлтгэх болсон байна. Энэ нь тухайн жилд гоц хурдалж, Гурван титэмийн 11 дэх эзнээр тодорсон Афирмед-тэй уралдах Марлборо стейкс 1 дүгээр зэрэглэлийн уралдаан байв. Гурван титэмийн хамгийн сүүлийн буюу 11 дэх эзэн, XX зууны шилдэг хүлгийн жагсаалтанд 12-т бичигдсэн гайхамшигт хурдан хүлэг Афирмедийг манай цахим хуудасны хэрэглэгчид санаж байгаа биз ээ.
 
Марлборо стейкс-т Афирмедийн мөнхийн өрсөлдөгч, Гурван титэмийн уралдаануудад бүгдэд аман хүзүүдсэн Алидар уралдахаар төлөвлөж байсан ч эцсийн мөчид татгалзсан байна. Энэ уралдаанд Сиатл Слью анх удаа түрүү хүлгийн тааврыг өнгөлж чадсангүй. Хурдан морины хорхойтнуудын ихэнх нь Афирмедэд бооцоогоо тавьж байна. Гэвч Сиатл Слью үнэхээр агуу хүлэг гэдгээ энэ уралдаанд дахин харуулж, тухайн жилийн Оны хүлэг Афирмедийг дийлэн түрүүлсэн юм. Үүнээс хоёр долоо хоногийн дараа болсон Вүүдвард стейкс уралдаанд Сиатл Слью мөн л тасархай түрүүлэв. Харин 10 дугаар сард болсон Жоки Клубын Алтан Цомын уралдаанд агуу Сиатл Слью, Афирмед хоёр ахин хамт уралдсан нь хурдан морины уралдааны түүхэн дэх хамгийн өрсөлдөөнтэй уралдааны нэг болсон юм. Энэ уралдаанд 2 гайхамшигт хүлэг зуузай холбон барианд орсон ба Афирмед хошуу илүү гаран түрүүлжээ. Афирмед-с хойш Гурван титэмийн эзэн цолтой хүлэг өнөөг хүртэл хараахан төрөөгүй л байна.
 
Уралдааны замд гайхамшгийг үзүүлж байсан Сиатл Слью зодог тайлж, үржүүлгэнд орсныхоо дараа цэвэр үүлдрийн адууны түүхэн дэх шилдэг азарганы нэг болсон юм.
 
Түүний үр удмаас Кентаки Дерби, Прийкнес Стейксийн түрүү Свейл, 1982 оны шилдэг шүдлэн байдас Ландалюс, 1983 оны шилдэг шүдлэн үрээ, 1983 оны шилдэг хязаалан үрээ Слью О’Гоүлд, 1992 оны хүлэг Эй Пи Инди, Прийкнес Стейксийн түрүү Бернардини, 2000 оны шилдэг хязаалан байдас Сөрфсайд, Белмонт Стейксийн түрүү Регс То Ричес, Бридерс Кап, Дубайн дэлхийн цомын түрүү, Оны хүлэг цолны 2 удаагийн эзэн алдарт Сигар тэргүүтэй олон цуутай хүлгүүд төржээ.
 
Түүний төлүүдээс хамгийн алдартай нь Эй Пи Инди. Уралдах үедээ онц хурдалж, Оны хүлэг цолны эзэн болж явсан тэрээр өнөө цагийн хамгийн шилдэг азарганы нэг билээ. Түүний үржүүлгийн хураамж 150000 доллар бөгөөд нэгэн даага нь өнгөрсөн жилийн дуудлага худалдаан дээр 4.2 сая доллараар зарагдаж олныг шуугиулж байв. Энэ жил 22 настай Эй Пи Инди-г цаашид үржүүлгэнд оруулахгүй болсноо эзэд нь хэдхэн хоногийн өмнө мэдэгдээд байна.
 
Сүүлийн үеийн хамгийн алдартай адуу Зенятта-г Сиатл Слью-н төл Эй Пи Инди-н төл Бернардини-тай үржүүлгэнд оруулж байгаа гэдгийг та бүхэн мэдэж байгаа биз ээ. Энэ 4 адуу нь бүгдээрээ хамгийн нэр хүндтэй цол болох Оны хүлэг цолны эзэд.

Эх сурвалж: www.mongoljockeyclub.com